ចូលរួមអបអរសាទរទៅកាន់ក្រុមហ៊ុន DBD Engineering Plc. ដែលបានទទួលពានរង្វាន់ The Asset Country Award ឆ្នាំ២០២១ នៅលើផ្នែកមូលបត្រកម្មសិទ្ធិដែលលក់ដាច់បំផុត។

អ្វីដែលគួរឲ្យកត់សម្គាល់នោះគឺថា ក្រុមហ៊ុន DBD Engineering ទើបតែចុះបញ្ចីលក់មូលបត្រកម្មសិទ្ធិជាផ្លូវការកាលពីថ្ងៃច័ន្ទ ទី០៦ ខែកញ្ញាឆ្នាំ២០២១នេះតែប៉ុណ្ណោះ។

ប៉ុន្ដែ ការផ្ទុះការគាំទ្ររបស់វិនិយោគិនជាច្រើន បានធ្វើឲ្យ DBD Engineering ទទួលបានពានលក់ដាច់បំផុតក្នុងរយៈពេលត្រឹមតែ ៣ខែ។ សមិទ្ធិផលទាំងនេះគឺបានមកពីការយកចិត្តទុកដាក់របស់ក្រុមហ៊ុនទៅលើស្តង់ដារ និងការផ្តល់ទំនុកចិត្តដល់អតិថិជន ទាំងការផ្ចិតផ្ចង់ទៅលើបច្ចេកទេស ការសាងសង់ ការដំឡើង និងការបញ្ចប់គម្រោងឲ្យទាន់ពេលវេលា។

ក្រុមហ៊ុន DBD Engineering បានចាប់បើកដំណើរការតាំងពីឆ្នាំ១៩៩៥មកម្ល៉េះ ដែលបានចាប់ផ្តើមពីក្រុមហ៊ុនបែបលក្ខណៈគ្រួសាររហូតបានលូតលាស់ និងពង្រីកខ្លួនក្លាយជាក្រុមហ៊ុនធំស្តង់ដាអន្តរជាតិ។ ក្រុមហ៊ុន DBD Engineering គឺជាក្រុមហ៊ុនពហុមុខងារផ្នែកវិស្វកម្ម និងសំណង់ ដែលផ្តល់សេវាកម្មដូចជា សេវាកម្មគូរប្លង់ សាងសង់ ដំឡើង និងថែទាំ ដែលធ្លាប់បានទទួលគម្រោងធំៗដែលត្រូវបានបញ្ចប់ដូចជា ផ្សារទំនើប Aeon 1, Aeon 2 គម្រោងខុនដូ North Park គម្រោងChip Mong Sen Sok រីឯគម្រោងដែលនៅបន្តរមានដូចជាគម្រោង Chip Mong 598 Mall គម្រោង Chip Mong Mega Mall 271 និងថ្មីៗនេះទើបតែប្រកាសថាខ្លួនបានទទួលគម្រោងការដំឡើង MEP របស់អគារខ្នាតធំ «Wing Office Tower» ដែលនឹងចាប់ផ្តើមការសាងសង់នៅឆ្នាំ២០២២ និងបញ្ចប់នៅឆ្នាំ២០២៣៕