ពីចាប់ដំណើរអភិវឌ្ឍន៍វិស័យពាណិជ្ជកម្មអេឡិចត្រូនិក (E-commerce) ក្នុងឆ្នាំ ២០១៧ ក្រោមការគាំទ្ររបស់អង្គការ UNCTAD តាមរយៈការបង្កើតការវិភាគ ការត្រៀមខ្លួន ស្ដីពីពាណិជ្ជកម្ម អេឡិចត្រូនិក (eTrade Readiness Assessment) ក្នុងឆ្នាំ២០១៧ ប្រទេសកម្ពុជាបានរីកចម្រើនគួរឱ្យកត់សម្គាល់ និងទទួលបានអត្រាអនុវត្តបាន ៩២ភាគរយ ក្នុងរបាយការណ៍ពិនិត្យឡើងវិញជាលើទីពីរ សមត្ថភាពខ្ពស់ជាងគេជាមួយកម្រិតអនុវត្តបាន ៩២ភាគរយ នៅក្នុងការរបាយការណ៍ពិនិត្យមើលឡើងវិញជាលើកទីពីរនៃ eTrade Readiness Assessment ឆ្នាំ ២០២២។

យោងតាមឯកសារចុះផ្សាយដោយក្រសួងពាណិជ្ជកម្ម​ ការវិភាគនេះមានសារៈសំខាន់ ក្នុងការចង្អុលបង្ហាញ ភាពខ្វះខាត និងបង្កើតជាផែនទីបង្ហាញ ផ្លូវមួយ ដើម្បីជំរុញការអភិវឌ្ឍ វិស័យពាណិជ្ជកម្ម តាមអេឡិចត្រូនិក នៅកម្ពុជា តាមរយៈ គោលនយោបាយអភិវឌ្ឍន៍ ចំនួន ៧ រួមមាន គោលនយោបាយ និងយុទ្ធសាស្ត្រ, ហេដ្ឋារចនាសម្ព័ន្ធ និងសេវាកម្ម ICT, ការសម្របសម្រួល និងឡូជី ស្ទីកពាណិជ្ជកម្ម, ដំណោះស្រាយលើការទូទាត់, ក្របខ័ណ្ឌនិងបទប្បញ្ញត្តិច្បាប់, ការអភិវឌ្ឍជំនាញ និងលទ្ធភាព ក្នុងការទទួលបានហិរញ្ញវត្ថុ។

ទាំងនេះត្រូវបានចាត់ទុកជាជោគជ័យរបស់ក្រសួងពាណិជ្ជកម្ម។ ថ្លែងនៅក្នុងពិធីសម្ពោធផ្លូវការណ៍នៃ «របាយការណ៍ Ecommerce ឆ្នាំ ២០២២ ដោយ PROFITENCE» កាលពីរសៀលថ្ងៃទី១៨ ខែមករា ឆ្នាំ ២០២៣ នៅសណ្ឋាគាររ៉ាហ្វល ឡឺរ៉ូយ៉ាល់ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានលើកឡើងនូវសមិទ្ធផលសំខាន់ៗពីក្រសួងពាណិជ្ជកម្មលើវិស័យ E-commerce នៅកម្ពុជា។

ឯកឧត្តមបានមានប្រសាសន៍ពីសមិទ្ធផលចម្បងទី១យ៉ាងដូច្នេះថា៖ «ការវិភាគយ៉ាងលឿនអំពីការត្រៀមខ្លួន ស្ដីពីពាណិជ្ជកម្ម អេឡិចត្រូនិកនៅប្រទេសកម្ពុជា បានធ្វើឱ្យប្រទេសនេះក្លាយជាប្រទេសទទួលបានអត្ថប្រយោជន៍​ដំបូងគេពីការវិភាគ ការត្រៀមខ្លួន ស្ដីពីពាណិជ្ជកម្ម អេឡិចត្រូនិក (eTrade Readiness Assessment) ដែលត្រូវបនធ្វើឡើងដំបូងបង្អស់កាលពីខែវិច្ឆិកា ឆ្នាំ ២០១៦។ លទ្ធផលនៃរបាយការណ៍ដើរតួនាទីជាការចូលរួមដ៏មានតម្លៃរបស់ប្រទេសមួយក្នុងការសកម្មនឹងកិច្ចពិភាក្សាជាច្រើនទាក់ទងនឹង e-commer និងពាណិជ្ជកម្មឌីជីថល។ លទ្ធផលរកឃើញពីរបាយការណ៍នេះក៏បានបញ្ជាក់ផងដែរនូវឧបសគ្គ ក៏ដូចជាផ្ដល់នូវតួលេខក្នុងការធ្វើសកម្មភាពរយៈពេលខ្លី និងមធ្យម ដើម្បីគាំទ្រការពន្លឿនការចាប់យកអនុវត្តន៍ e-commerce នៅក្នុងរាជរដ្ឋាភិបាលកម្ពុជា»។

ចំណុចទី ២ នៃសមិទ្ធផលជោគជ័យរបស់ក្រសួងផងដែរថា ចាប់តាំងពីច្បាប់ស្ដីពីពាណិជ្ជកម្មតាមប្រព័ន្ធអេឡិចត្រូនិកត្រូវបានអនុម័តកាលពីថ្ងៃទី ២ ខែវិច្ឆិកា ឆ្នាំ២០១៩ ហើយវាបានដើរតួនាទីជាមូលដ្ឋានគ្រឹះផ្នែកច្បាប់ក្នុងការគ្រប់គ្រង និងអភិបាលលើសកម្មភាពពាណិជ្ជកម្មអេឡិចត្រូនិកនៅកម្ពុជា។

ចំណុចទី ៣ នៃសមិទ្ធផលរបស់ក្រសួងពាណិជ្ជកម្ម ឯកឧត្តម សំហេង បូរ៉ា បានបន្តថា៖ «ជំពូក ពាណិជ្ជកម្មអេឡិចត្រូនិកត្រូវបានដាក់បញ្ចូលក្នុងយុទ្ធសាស្ត្រសមាហរណកម្មពាណិជ្ជកម្មនៅកម្ពុជាឆ្នាំ ២០១៩-២០២៣។ អង្គការ UNCTAD បានផ្ដល់នូវការឧបត្ថម្ភគាំទ្រ ក្នុងការផលិត និងសរសេរជំពូកមួយនៅក្នុងយុទ្ធសាស្ត្រសមាហរណកម្មពាណិជ្ជកម្មនៅកម្ពុជាឆ្នាំ ២០១៩-២០២៣ ដោយចង្អុរបង្ហាញនូវវិស័យពាណិជ្ជកម្មអេឡិចត្រូនិកថាជាប្រភពនៃការរីកចម្រើនរបស់ប្រទេសកម្ពុជា»។

យុទ្ធសាស្ត្រពាណិជ្ជកម្មអេឡិចត្រូនិក ជាសមិទ្ធផលទី ៤ ដែលត្រូវបានបង្កើត និងសម្ពោធចាផ្លូវការកាលពី ខែវិច្ឆិកា ឆ្នាំ ២០២០ ក្រោមការចូលរួមពីបណ្ដាក្រសួង ដៃគូអភិវឌ្ឍ និងវិស័យឯកជននៅកម្ពុជា។ យុទ្ធសាស្ត្រ​នេះបានក្ដោបនូវធាតុសំខាន់ទាំង១០ ដែលត្រូវបានបង្ហាញនៅក្នុងស្ថានភាបបច្ចុប្បន្ន ឧបសគ្គ ឱកាស និងសកម្មភាពគោលនយោបាយ រាប់តាំងពីគម្រោងផែនការ និងគោលនយោបាយស្ថាប័ន រហូតដល់ព័ត៌មាន និងការផ្សព្វផ្សាយពីពាណិជ្ជកម្មឌីជីថល។

សមិទ្ធផលសំខាន់ទី ៥ គឺគម្រោងអភិវឌ្ឍន៍វិស័យពាណិជ្ជកម្មតាមប្រព័ន្ធអេឡិចត្រូនិកនៅកម្ពុជា (Go4eCAM) របស់ក្រសួងពាណិជ្ជកម្ម ដោយឯកឧត្តមរដ្ឋលេខាធិការបានលើកឡើងថា៖ «វាមានកម្មវត្ថុបង្កើនឱកាសសេដ្ឋកិច្ចនៅកម្ពុជា សម្រាប់វិស័យសហគ្រាសធុនតូច និងមធ្យម ក្នុងការចូលរួមពាណិជ្ជកម្មអេឡិចត្រូនិក និងសេដ្ឋកិច្ចឌីជីថល។ ក្រោមគម្រោងនេះ យើងបាននិងកំពុងអភិវឌ្ឍទីផ្សារអេឡិចត្រូនិក B2B2C មានឈ្មោះថា Cambodiatrade.com សម្រាប់សហគ្រាសធុនតូច និងមធ្យមអាចដាក់លក់នូវផលិតផលក្នុងស្រុក និងទីផ្សារឆ្លងព្រំដែន ដោយផ្ដោតលើការបញ្ជ្រាបឌីជីថល និងគាំទ្រដល់ សហគ្រាសធុនតូច និងមធ្យម នៅតាមបណ្ដាខេត្ត និងការចូលរួមពីសហគ្រិនស្ត្រីផង​ដែរ»៕