បើមានទម្លាប់ចាយលុយ៥យ៉ាងនេះរាល់ថ្ងៃ ទោះប្រាក់ខែប៉ុន្មានលានក៏គ្មានថ្ងៃសល់ដែរ

2021-10-28 07:18:22
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្មាននរណាម្នាក់ដែលថា មិនចង់សល់លុយឡើយ តែមនុស្សតិចណាស់ចេះច្បាស់ពីក្បួនចាយលុយ ព្រោះមនុស្សភាគច្រើនចាយលុយទៅតាមខួរក្បាលបញ្ជា។ ដូច្នេះហើយ តើគួរធ្វើដូចម្ដេចទើបឲ្យសល់លុយ? ខាងក្រោមនេះ ជាការឆ្លុះបញ្ចាំងពីទម្លាប់ចាយលុយមិនល្អ ជាហេតុធ្វើឲ្យអ្នកមិនងាយនឹងសល់លុយ៖

១. យកការចំណាយអត់ចាំបាច់ និងចំណាយចាំបាច់មកច្របល់ជាមួយគ្នា

ចំណុចនេះ គឺមានន័យថាប្រាក់ខែដែលបើកភ្លាម គួរលៃលកលើការចំណាយណាដែលចាំបាច់ឲ្យអស់សិន។ អ្វីដែលត្រូវការចំណាយដើមខែដូចជា៖ ថ្លៃផ្ទះ ថ្លៃទឹក ថ្លៃភ្លើង ថ្លៃសាលាជាដើម។ ឯការចំណាយណាដែលមិនសូវចាំបាច់ដូចជាសំលៀកបំពាក់ កាបូប ស្បែកជើង សម្ភារៈនិយមមួយចំនួនទៀត មិនគួរយកមកបូកលាយឡំនោះទេ។ កាលណាយកទាំង២យ៉ាងមកច្របូកចូលគ្នានៅដើមខែ ប្រាកដជាមិនដឹងថាចំណាយអស់ទៅលើអ្វីខ្លះឡើយ ហើយថែមទាំងធ្វើឲ្យពាក់កណ្ដាលខែអស់លុយចាយរលីងក៏មាន។

២. ចូលចិត្តតែចំណាយអ្វីដែលលើសពីសមត្ថភាព

មានលទ្ធភាពចូលហាងទំនើបរាល់ថ្ងៃ មានសមត្ថភាពទិញរបស់ថ្លៃប្រើតាមចិត្តចង់ តាមកម្រិតប្រាក់ខែ តែបានត្រឹមមួយគ្រប់ៗ ហើយចុងខែគ្មានលុយសល់ គេមិនហៅអ្នកធូរធារឡើយ គឺហៅថាមនុស្សចាយមិនចេះប្រមាណខ្លួនទៅវិញទេ។ អ្វីដែលគួរធ្វើ គួរតែទុកលុយសម្រាប់ការចំណាយលើអាហារថ្លៃៗ និងរបស់ថ្លៃៗទាំងនោះ មកជាប្រាក់សម្រាប់សន្សំ ហើយគួរងាកមកប្រើរបស់ណា អាហារណាដែលសមរម្យវិញទើបជាការប្រសើរ។ ប្រសិនបើចំណាយទៅតាមទឹកលុយដែលមាននៅក្នុងដៃ ទោះអ្នកធ្វើការរាប់ឆ្នាំទៀតក៏មិនសល់លុយផង។

៣. ឃើញសល់លុយច្រើននៅចុងខែខំបង្ហើយឲ្យអស់

ចំពោះគំនិតអ្នកមានមិនថាលុយប៉ុន្មានសុទ្ធតែអាចទុកសន្សំបានទាំងអស់ តែផ្ទុយមកវិញអ្នកដែលមិនមានផែនការសន្សំ បើឃើញចុងខែនៅសល់លុយច្រើន បែរជាខំចាយឲ្យអស់ ព្រោះអាងជិតបើកប្រាក់ខែ។ នេះជាការយល់ឃើញខុសទាំងស្រុង បើខំចាយត្បិតត្បៀតតាំងពីដើម ខែបែរមកព្រលែងចោលចុងខែ តើមានន័យអ្វី? លុយចុងខែនេះហើយ ជាឱកាសល្អដែលយើងអាចទុកសន្សំបាន មិនថាលុយនោះច្រើន ឬតិចយ៉ាងណាក្ដី។

៤. ព្យាយាមធ្វើខ្លួនឲ្យចុះជាមួយអ្នកមានទាំងខ្លួនមិនមានលទ្ធភាពគ្រប់គ្រាន់

ការសេពគប់មិត្តភក្ដិក៏ជាកត្តាសំខាន់ ក្នុងការចាយវាយដែរ ដើរជាមួយអ្នកអត់ដូចគ្នា ទោះហូបតាមចិញ្ចើមផ្លូវអ្វីក៏ឆ្ងាញ់ តែកូនអ្នកមានលុះត្រាហាងទំនើបទើបទាន់សម័យ។ អ្នកមានខ្លាំងទោះមួយថ្ងៃគេចំណាយប៉ុន្មានក៏មិនខ្វល់ តែចំពោះយើងត្រឹមមានប្រាក់ខែល្មមមួយគ្រប់ៗ បើហ៊ានតែធ្វើដូចគេប្រាកដជាវេទនាដល់ខ្លួនឯងមិនខាន។ ដូច្នេះហើយបើមិនហ៊ានប្រកែកការណាត់ ការជួបជុំខ្លះ នោះប្រាកដជាគ្មានថ្ងៃសល់លុយឡើយ ព្រោះលុយដែលបម្រុងនឹងសល់ត្រូវយកទៅចំណាយជាមួយនឹងមនុស្សទាំងនោះ។

៥. ចាយដោយផ្អែកតាមអារម្មណ៍មិនផ្អែកលើតម្រូវការជាក់ស្ដែង

ចាយទៅតាមតម្រូវការចាំបាច់ដែលខានមិនបាន និងចាយទៅតាមអារម្មណ៍គឺមានលក្ខណៈខុសគ្នា។ ចាយទៅតាមអារម្មណ៍បញ្ជាជួនកាលវាមិនមែនជាតម្រូវការចាំបាច់ឡើយ មានន័យថាចាយក៏បានអត់ក៏បាន។ ជួនកាលចំណាយលើរបស់អ្វីមួយហើយ យើងអាចនឹងនឹកឃើញថា បើពេលនោះខ្ញុំមិនទិញរបស់ហ្នឹងក៏បាន ព្រោះពេលទិញមកហើយទុកចោលដដែល។ ដូច្នេះមុនចាយត្រូវសួរខ្លួនឯងសិនថា តើវាពិតជាតម្រូវការចាំបាច់ដែរទេ? ត្រូវសួរខ្លួនឯងគ្រប់ពេលប្រសិនបើអ្នកពិតជាចង់សល់លុយមែន៕

ពាក្យទាក់ទង