រោងចក្រផ្គុំ និងដំឡើងគ្រឿងបរិក្ខាអគ្គីសនី តម្លៃ ២,៥លានដុល្លារ នៅខេត្តពោធិ៍សាត់ សម្ពោធជាផ្លូវការ

  • 2022-02-28 10:42:17
  • ចំនួនមតិ 4 | ចំនួនចែករំលែក 1

ចន្លោះមិនឃើញ


ពោធិ៍សាត់៖ រោងចក្រផ្គុំ និងដំឡើងគ្រឿងបរិក្ខាអគ្គិសនីរបស់ក្រុមហ៊ុន ស្នេថេក ឈីន ឯ.ក (SchneiTec CHINT Co.,Ltd) ស្ថិតក្នុងភូមិអន្សក្តាម ឃុំស្នាអន្សារ ស្រុកក្រគរ ខេត្តពោធិ៍សាត់ ដែលមានតម្លៃប្រមាណ ២,៥លានដុល្លារ ត្រូវបានធ្វើពិធីសម្ពោធដាក់ឱ្យដំណើរការជាផ្លូវការ នាថ្ងៃទី២៨ ខែកុម្ភៈ ឆ្នាំ២០២២ ក្រោមអធិបតីភាពដ៏ខ្ពង់ខ្ពស់ ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តពោធិ៍សាត់។

ពិធីនេះបានការអញ្ជើញចូលរួមពីសំណាក់ឯកឧត្តម កែវ រតនៈ រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកអគ្គីសនីកម្ពុជា និងជាប្រធានក្រុមការងាររាជរដ្ឋាភិបាល ចុះជួយមួលដ្ឋានស្រុកក្រគរ និងស្រុកកណ្តៀង និងឯកឧត្តម ជាវ តាយ អភិបាលនៃគណៈអភិបាលខេត្តពោធិ៍សាត់ ព្រមទាំងថ្នាក់ដឹកនាំមន្ទីរអង្គភាពនានាជុំវិញខេត្ត កងកម្លាំងប្រដាប់អាវុធទាំង៣ អាជ្ញាធរមូលដ្ឋាន លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ។

បើតាមលោកបណ្ឌិត ហេង សុជាតិ អគ្គនាយកក្រុមហ៊ុន SchneiTec CHINT បានជម្រាបជូនថា ដោយមើលឃើញពីសន្ទុះនៃការអភិវឌ្ឍឥតឈប់ឈរ របស់ប្រទេសកម្ពុជា ដែលនាំឱ្យមានការកើនឡើងយ៉ាងឆាប់រហ័ស នូវតម្រូវការគ្រឿងបរិក្ខាអគ្គីសនី ក៏ដូចជារួមចំណែកជាមួយរាជរដ្ឋាភិបាល ក្នុងការអភិវឌ្ឍថាមពល តាមរយៈការបង្កើននូវធនធាន និងចំណូលក្នុងស្រុកផងនោះ ក្រុមហ៊ុនរបស់លោក ក៏បានសម្រេចចិត្តបណ្តាក់ទុនរួមគ្នាជាមួយ ក្រុមហ៊ុន ឈីន គ្លូប៊ល ដើម្បីបង្កើតរោងចក្រផ្គុំ និងតម្លើងគ្រឿងសម្ភារៈអគ្គីសនី ក្នុងស្រុកនេះឡើង។

លោកបណ្ឌិតបានលើកឡើងថា ការកើនឡើង នៃរោងចក្រនេះ ក៏បានមកពីការលើកទឹកចិត្ត និងជួយជ្រោមជ្រែងផ្នែកផ្លូវច្បាប់ ពីប្រមុខរាជរដ្ឋាភិបាលកម្ពុជា ក៏ដូចជាស្ថាប័នពាក់ព័ន្ធនានា មានក្រសួងរ៉ែ និងថាមពល អគ្គីសនីកម្ពុជា អាជ្ញាធរអគ្គីសនីកម្ពុជា ក្រុមប្រឹក្សាអភិវឌ្ឍន៍កម្ពុជា និងអាជ្ញាធរខេត្តជាដើម ជាមួយទុនវិនិយោគប្រមាណ ២,៥លានដុល្លារ។

រោងចក្រនេះសាងសង់លើផ្ទៃដី ២០.០០០ម៉ែតការ៉េ ជាមួយអគាររោងចក្រ ៣.០០០ម៉ែត្រការ៉េ សម្រាប់ជំហានទីមួយ ដែលផ្ដោតចម្បងជាបឋម ទៅលើការផលិតគ្រឿងសម្ភារៈអគ្គីសនី តង់ស្យុងកំរិតមធ្យមគ្រប់ប្រភេទ និងសម្ភារៈប្រព័ន្ធសូឡា ដើរដោយពន្លឺព្រះអាទិត្យខ្នាតតូច។

លោកអគ្គនាយកបន្ថែមថា រោងចក្រនេះមានគោលដៅ នាំមកនូវបច្ចេកវិទ្យាថ្មីៗចុងក្រោយ ក្នុងការផលិតគ្រឿងសម្ភារៈអគ្គីសនីគ្រប់ប្រភេទ ចាប់ពីតង់ស្យុងកម្រិតទាប មធ្យម រហូតដល់កម្រិតខ្ពស់ ប្រកបដោយគុណភាពខ្ពស់ និងតម្លៃសមរម្យ ដើម្បីតម្រូវទីផ្សាក្នុងស្រុក និងបន្តផែនការក្នុងការនាំចេញផលិតផលទាំងនេះ ទៅប្រកួតប្រជែងទីផ្សាក្រៅស្រុក នាពេលអនាគតផងដែរ។

លោកសង្ឃឹមយ៉ាងមុតមាំថា ការវិនិយោគក្នុងការបង្កើតរោងចក្រផ្គុំ និងតម្លើងគ្រឿងសម្ភារៈអគ្គីសនីក្នុងស្រុកមួយនេះ នឹងអាចធ្វើឱ្យអតិថិជន ដែលធ្លាប់ប្រើប្រាស់សម្ភារៈអគ្គីសនីនាំចូលពីបរទេស ងាកមកគាំទ្រផលិតផលក្នុងស្រុក ម៉ាកCHINT នេះវិញម្ដង។ លោកបណ្ឌិតក៏បានគូសបញ្ជាក់ថា ផលិតផលម៉ាក CHINT នេះមានលក់នៅ១៤០ប្រទេសជុំវិញពិភពលោក និងទទួលបានការទុកចិត្តពីអ្នកប្រើប្រាស់គ្រប់មជ្ឈដ្ឋាន។

ឯកឧត្តម ស៊ុយ សែម រដ្ឋមន្ត្រីក្រសួងរ៉ែ និងថាមពល បានសម្ដែងនូវការកោតសរសើរ និងអបអរសាទរចំពោះជោគជ័យនៃកិច្ចសហការ និងការបណ្ដាក់ទុនរួមគ្នា រវាងក្រុមហ៊ុនក្នុងស្រុករបស់យើង ក្រុមហ៊ុន SchneiTec គ្រុប ជាមួយក្រុមហ៊ុនវិនិយោគមកពីប្រទេសចិន គឺក្រុមហ៊ុន CHINT គ្រុប ក្នុងការវិនិយោគបង្កើតជារោងចក្រផ្គុំ និងតម្លើងសម្ភារៈគ្រឿងបរិក្ខារអគ្គីសនីដ៏ទំនើបនេះឡើង នៅក្នុងស្រុកក្រគរខេត្តពោធិ៍សាត់។

ឯកឧត្តមរដ្ឋមន្ត្រី បន្តទៀតថា ស្រុកក្រគររបស់យើងនេះ ពុំធ្លាប់មានការវិនិយោគអ្វីទាល់តែសោះពីមុនមក ទើបតែសម័យសម្ដេចតេជោ ហ៊ុន សែន នេះទេ មានរោងចក្រកាត់ដេរ រោងចក្រផ្តុំ និងដំឡើងបរិក្ខាអគ្គីសនី រោងចក្រផលិតអគ្គិសនីដើរដោយពន្លឺព្រះអាទិត្យ រោងចក្រផលិតកែវ និងទុយោ ធ្វើអំពីគ្រាប់ធញ្ញជាតិ និងរោងចក្រផ្តុំ និងដំឡើងរថយន្ត Ford របស់សហរដ្ឋអាមេរិក។

ជាថ្មីម្តងទៀត ឯកឧត្តមជឿជាក់ថា កូនចៅយើងអ្នកស្រុកក្រគរ នឹងខិតខំធ្វើការដោយរក្សាបាននូវស្នាដៃ និងកិត្តិយស សម្រាប់ខ្លួនឯងផង គ្រួសារផង ក៏ដូចស្រុកក្រគរ និងខេត្តពោធិ៍សាត់យើងទាំងមូលផងដែរ៕

អត្ថបទ៖ In Sopheng

អត្ថបទពេញនិយម
អត្ថបទថ្មី