សាលាអន្តរជាតិ វេសវីយូ កម្ពុជាបានកំពុងតែបន្តអភិវឌ្ឍនូវគុណភាព និងប្រសិទ្ធភាពនៃការអប់រំដែលផ្តល់ជូនសិស្សានុសិស្សនូវថ្នាលបណ្តុះបណ្តាលស្តង់ដាអន្តរជាតិ រួមផ្សំទាំងការបញ្ចូលនូវគុណតម្លៃជាខ្មែរសម្រាប់ភាពជោគជ័យទៅថ្ងៃអនាគត។

ការខិតខំប្រឹងប្រែង អត់ធ្មត់ និងយកគុណភាព ក៏ដូចជាសុខមាលភាពរបស់សិស្សានុសិស្សជាគោលនេះហើយទើបធ្វើឱ្យសាលាអន្តរជាតិ វេសវីយូ កម្ពុជាត្រូវបានជាប់ជាស្ថាពរក្នុងការក្លាយជាសមាជិករបស់អង្គភាពទទួលស្គាល់ស្តង់ដាគុណភាពអប់រំកម្រិតអន្តរជាតិដ៏កំពូលមួយ ដែលមានឈ្មោះថា Council of International Schools (CIS)។

សមិទ្ធិផលនេះនាំឲ្យយើងក្លាយជាសាលាអន្តរជាតិដែលមានការទទួលស្គាល់គុណភាពជាសកល និងទទួលស្គាល់ដោយសាកលវិទ្យាល័យធំៗ ដែលជាសមាជិករបស់ CIS ផងដែរ ហើយនេះបានឆ្លុះបញ្ចាំងនូវការទទួលស្គាល់ទៅលើការគ្រប់គ្រងប្រកបដោយប្រសិទ្ធភាពខ្ពស់ ការអប់រំដែលអនុលោមតាមស្តង់ដាកម្រិតអន្តរជាតិដោយបញ្ចូលនូវកម្មវិធីភាសាខ្មែរ ការយកចិត្តទុកដាក់លើសុខភាព និងសុខមាលភាពរបស់សិស្សានុសិស្សគ្រប់ៗរូប។

ទន្ទឹមនឹងការក្លាយជាសមាជិករបស់ CIS សាលាអន្តរជាតិ វេសវីយូ កម្ពុជាក៏បានទទួលនូវពានរង្វាន់ពីស្ថាប័នអន្តរជាតិឈ្មោះថា HR Asia ក្នុងការវាយតម្លៃថាសាលាជាអង្គភាពដែលទទួលបានការពេញចិត្តខ្ពស់ពីសំណាក់បុគ្គលិកគ្រប់ជាន់ថ្នាក់ក្នុងតំបន់អាស៊ី ឆ្នាំ២០២១ (Best Companies to Work for in Asia 2021) ទៅលើចក្ខុវិស័យផ្តោតទៅលើគុណភាពជាចម្បង ការផ្តល់ជូនបុគ្គលិកនូវបរិបទធ្វើការប្រកបដោយការយកចិត្តទុកដាក់លើសុខមាលភាព ស្ថេរភាពផ្នែកសេដ្ឋកិច្ចរបស់បុគ្គលិក ការផ្តល់ឱកាសក្នុងការអភិវឌ្ឍសមត្ថភាព និងជំនាញរបស់នយោជិក ការលើកទឹកចិត្ត និងការផ្តល់យោបល់សម្រាប់ការបំពេញភារកិច្ចប្រកបដោយប្រសិទ្ធភាពខ្ពស់ទោះជាស្ថិតក្នុងស្ថានភាពដែលសាលាអន្តរជាតិជាច្រើននៅក្នុងប្រទេសកម្ពុជា ក៏ដូចជានៅតាមបណ្តាលប្រទេសនានាទូទាំងសកលលោកបានទទួលរងផលប៉ះពាល់យ៉ាងណាក៏ដោយក៏សាលាអន្តរជាតិ វេសវីយូ កម្ពុជានៅតែបន្តជំហយ៉ាងរឹងមាំដដែល។

សាលាអន្តរជាតិ វេសវីយូ កម្ពុជា នឹងបន្តផ្តោតសំខាន់ទៅលើការផ្តល់បរិយាកាសធ្វើការប្រកបដោយប្រសិទ្ធភាពខ្ពស់ និងអប់រំកម្រិតស្តង់ដាអន្តរជាតិដែលបណ្តុះសិស្សានុសិស្សឱ្យមានចំណេះដឹង ចំណេះធ្វើក៏ដូចជាការគិតទូលំទូលាយជាសកល ដោយរួមបញ្ចូលការគោរពស្រលាញ់ភាសា ប្រពៃណី ទំនៀមទម្លាប់របស់ខ្មែរ ព្រោះក្នុងសម័យកាលសកលភាវូបនីយកម្ម បុគ្គលដែលអាចជោគជ័យបានគឺតម្រូវឱ្យមានសមត្ថភាពក្នុងការវែកញែក វិភាគ និងពិចារណាឱ្យបានច្បាស់លាស់នូវរាល់កត្តាដែលកើតមានឡើងនៅក្នុងសង្គម ក៏ដូចជាក្នុងសកលលោកដើម្បីជាទុនក្នុងការទំនាក់ទំនងជាមួយបុគ្គលទាំងឡាយនៅលើឆាកអន្តរជាតិ និងអាចមានភាពវិនិច្ឆ័យ ធ្វើការសម្រេចចិត្តបានត្រឹមត្រូវដោយផ្អែកទៅលើការវិភាគយ៉ាងដិតដល់។

យ៉ាងណាមិញ ដើម្បីអាចឱ្យសិស្សានុសិស្សជោគជ័យមិនថាលើមុខរបររកទទួលទាន ឬការប្រកបការងារណាមួយក្នុងបរិបទកម្ពុជា ចំណេះដឹងលើភាសាជាតិច្បាស់លាស់ ការយល់ពីប្រពៃណី ទំនៀមទម្លាប់របស់ខ្មែរអាចឱ្យពួកគាត់បង្កើននូវភាពចុះចម្រុង ការប្រាស្រ័យទាក់ទងល្អ ក៏ដូចជាយល់ច្បាស់អំពីផ្នត់គំនិតរបស់ប្រជាជនខ្មែរដែលនេះជាកតាលិករដែលនាំមកនូវកត្តិយស និងភាពជោគជ័យ។ ហេតុដូចនេះទើបសាលាអន្តរជាតិ វេសវីយូ កម្ពុជាផ្តល់ភាពសំខាន់ទៅលើគោលការណ៍ "អប់រំឱ្យមានការគិតជាសកល ដោយរក្សាបាននូវគុណតម្លៃជាខ្មែរ" ៕